Airbus kompaniýasynyň A320 uçary awiasiýanyň taryhynda bazara iň köp çykarylan ýolagçy uçary boldy. Bu barada Cirium analitiki kompaniýasynyň maglumatlaryna salgylanyp, Reuters habar berýär.
A320 uçary 1984-nji ýylda çykaryldy. Onuň ilkinji uçuşy 1987-nji ýylda boldy, 1988-nji ýylda bolsa ulanylyşa goýberildi. Şondan bäri A320 uçarlarynyň umumy üpjünçiligi 12 260 birlige ýetdi. Bu görkeziji A320neo uçary Flynas saud awiakompaniýasyna gowşurylandan soň gazanyldy. Şeýlelikde, Ýewropa öndürijisi eýýäm birnäçe ýyl bäri öňdebaryjylygy saklaýan Boeing 737 uçaryndan ilkinji gezek öňe geçdi.
Airbus bu üstünlige teswir bermekden saklandy. Hünärmenler netijäni dünýäniň iň uly iki awiaöndürijisiniň köpden bäri dowam edip gelýän bäsdeşliginde möhüm tapgyr diýip atlandyrýar.
Airbus dünýäniň öňdebaryjy awiakosmos konsernleriniň hataryna girýär. Onuň düzüminde ýolagçy uçarlaryny (Airbus SAS), harby we kosmos enjamlaryny (Airbus Defence and Space), şeýle-de dikuçar (Airbus Helicopters) öndürmek boýunça bölümçeler bar.
