Nobel komiteti 2025-nji ýylyň edebiýat boýunça baýragynyň eýesini yglan etdi. Baýragy “apokaliptik elhençligiň möwjän döwründe sungatyň güýjüni tassyklaýan täsirli we öňdengörüjilikli döredijiligi üçin” wengriýaly ýazyjy Laslo Krasnahorkai aldy.
Krasnahorkai 1954-nji ýylda doguldy. Onuň belli eserleriniň arasynda “Şeýtan tangosy”, “Garşylyk melanholiýasy”, “Demirgazykdan – dag, günortadan – köl, gündogardan – ýol, günbatardan – derýa”, “Si-wan-mu şu ýerde biziň aramyzda” we “Soňky möjek” romanlary bar. Onuň döredijiliginde daşky aragatnaşyklardan üzňeleşdirilen we geljegi näbelli dünýäde adamlaryň grotesk barlygy barada antiutopik tymsallar agdyklyk edýär.
Ýazyjy öz romanlary, nowellalary we ssenarileri boýunça birnäçe filmleri düşüren režissýor Bela Tarr bilen işjeň hyzmatdaşlyk edýär.
2015-nji ýylda Krasnahorkai Halkara Buker baýragynyň eýesi boldy.
Geçen ýyl Nobel baýragyny “taryhy şikeslere garşy durýan we adamzat durmuşynyň gowşaklygyny açyp görkezýän baý şahyrana prozasy üçin” günorta koreýaly ýazyjy Han Gan aldy.
Şeýle-de, 2025-nji ýylyň Nobel hepdeliginiň dowamynda 10-njy oktýabrda parahatçylyk boýunça baýragyň, 13-nji oktýabrda bolsa Alfred Nobeliň hatyrasyna ykdysadyýet boýunça baýragyň eýeleri yglan ediler.
Ozal fiziologiýa we lukmançylyk, fizika hem himiýa boýunça laureatlar belli boldy.
