Budapeştde gollandiýaly postimpressionist Winsent Wan Goguň (1853-1890) eseriniň bolmagy mümkin diýip hasaplanýan kartina tapyldy diýip, Wengriýanyň Blikk neşiri habar berýär.
Kartina eseriň awtorlygyny we döredilen döwrüni anyklamak üçin daşary ýurtly kolleksiýaçy tarapyndan Nakgaşçylyk barlaglary laboratoriýasyna ekspertizadan geçirmek üçin berildi.
Laboratoriýanyň müdiri Žofiýa Wegwari boýaglaryň himiki düzümine esaslanyp, kartina 1885-1890-njy ýyllar aralygynda çekilipdir diýen netijä geldi.
Bu eser Pariždäki Orse muzeýinde saklanýan "Arldaky tans zaly" (1888) eseri bilen meňzeş diýen ýalydyr. Bilermenler bu tapyndynyň meşhur kartina üçin deslapky barlag etýudy bolmagynyň mümkindigini çaklaýarlar.
"Suratkeşler köplenç bir tema boýunça birnäçe eser döredýärler we Winsentiň özi bu barada dogany Teo ýazan hatlarynda nygtaýar. Belki, bu hem şol bir eseriň taýynyň mysalydyr; barlaglar we sowallaryň jogaplaryny gözlemek dowam edýär" diýip, Wegwari belledi.
Kartinanyň häzirki eýesi we onuň satyn alnyş taryhy barada heniz maglumat berilmedi.
