Germaniýanyň Bundestagy ýurduň migrasiýa kanunçylygyna üýtgetmeleri tassyklady, ol üýtgetmeler üç ýylyň içinde tizleşdirilen tertipde nemes raýatlygyny almak mümkinçiligini ýok edýär, diýip Deutsche Welle habar berýär.
Düzedişleriň güýje girmegi üçin olary indi Germaniýanyň federal döwletleriniň wekillerinden ybarat Bundesrat hem tassyklamaly.
Ýatladyp geçsek, 2024-nji ýylyň ýanwar aýynda mejlis raýatlyk almagyň tertibini ýönekeýleşdirýän kanuny kabul edipdi. Ol kanun daşary ýurtlulara C1 derejesinde nemes dilini bilmek we meýletinçilik işlerine gatnaşmak ýaly şertleri ýerine ýetiren ýagdaýynda, üç ýylyň içinde nemes pasportyny almaga mümkinçilik berýärdi.
Emma 2025-nji ýylyň ýazynda konserwatiw CDU/CSU fraksýasy bilen dolandyryjy koalisiýany döreden Germaniýanyň Sosial-demokratik partiýasynyň wekilleri bu maddany ýatyrmak barada ylalaşdylar. Netijede, Germaniýa indi raýatlyk almak üçin has uzak wagtlyk ýaşaýyş talaplaryny öňe sürýän öňki düzgünlere dolanýar.
