Britaniýanyň Encor atly startap kompaniýasy (Lotus-yň we Aston Martin-iň öňki inženerleri işleýär) nusgawy Lotus Esprit kupesiniň restomod görnüşini hödürledi. Taslama modeliň 50 ýyllygyna bagyşlandy.
Awtoulag Jorjetto Jujaro tarapyndan döredilen birinji nesil S1 äheňinde ýerine ýetirildi. Bu model 1977-nji ýylda düşürilen “Meni söýen içaly” (“The Spy Who Loved Me”) atly Jeýms Bond baradaky filmde kowalaşyk we suwuň astyndaky sahnalar arkaly meşhurlyk gazandy.
Kuzowy şekili boýunça S1-e meňzeş bolsa-da, köp elementler soňrakky Esprit nesillerinden alyndy. 50 awtoulagyň ählisi üçin donor hökmünde 1996–2004 ýyllar aralygynda çykarylan Esprit S4 V8 ulanylar. 3,5 litrlik turbomotorly V8 (355 at güýji) doly täzeden işlenip taýýarlanyldy, bu bolsa awtoulagyň dinamikasyny we gündelik sürüş amatlylygyny ýokarlandyrýar.
Salonynda deri we alkantradan taýýarlanan bezegler, alýumin elementleri, Apple CarPlay bilen enjamlaşdyrylan multimediýa ulgamy, kondisioner hem-de daş-töweregi doly görkezip bilýän kamera ulgamy bar. Esasy aýratynlyklaryň biri bolan öňe çykýan faralar saklanyp galdy, emma olar häzirki zaman LED bloklary bilen enjamlaşdyryldy.
Jemi 50 sany şeýle restomod öndüriler, her biriniň bahasy azyndan 430 müň funt sterling (takmynan 540 müň dollara) deň bolar.
