“The Fast and the Furious: Tokyo Drift” (Тройной форсаж: Токийский дрифт) filminden meşhur Mazda RX-7 Gudwuddaky Tizlik festiwalynyň çäklerinde geçirilen Bonhams auksionynda satyldy. Ahyrky baha 911 müň funt sterling – takmynan, 1,2 mln dollar boldy.
Veilside kompaniýasyndan seýrek týuninge eýe bolan mämişi-gara Mazda RX-7 “Forsaž” franşizasynyň üçünji filminde ulanyldy we Han atly gahrymana degişlidi. Bilermenler bu ulagyň taryhda iň gymmat Mazda RX-7 bolup biljekdigini çaklaýar.
2006-njy ýylyň filmini düşürmek üçin RX-7 FD-niň esasynda Veilside Fortune modelinden iki nusga döredildi. Auksionçylaryň maglumatlaryna görä, satylan awtomobil saklanyp galan ýeke-täk nusga boldy. Ol diňe hereketsiz sahnalar we uly planlar üçin ulanyldy.
Film düşürilip bolandan soň, awtomobil bir adam tarapyndan satyn alyndy, ol 2008-nji ýylda ony Beýik Birtaniýa getirdi. Şondan bäri ulag onuň eýeçiliginde bolup, gowy ýagdaýda saklandy. 280 at güýjüni berýän hereketlendiriji RE Amemiya ýapon týuning-atelýesinde kämilleşdirildi.
Kinofranşizanyň filmlerinde peýda bolan iň gymmat ulag iki gapyly Nissan GT-R R34-dir. Ony “Forsaž 4-de” Pol Uokeriň gahrymany dolandyrdy. Ol 2023-nji ýylda 1,36 mln dollara satyldy.
