Massaçusets Tehnologiýa Institutynyň (MIT) alymlary öň işlenip düzülen elektron geçiriji uglerodly betony (ec3) kämilleşdirdiler. Bu işläp taýýarlama öýüň binýadyny ýa-da diwarlaryny energiýa saklaýan enjama öwürýär diýip, New Atlas habar berýär.
Täze görnüşdäki material 2023-nji ýyldaky prototip bilen deňeşdirilende dokuz esse köp energiýa saklap bilýär. Indi ortaça bir öýüň bir günlük elektrik sarp edişini kanagatlandyrmak üçin bary-ýogy bäş kub metr beton (takmynan ýerzeminiň diwary ýaly möçber) ýeterlikdir. Öň bu görkeziji 45 kub metre deňdi.
Bir kub metr ec3 betony 2 kW·s-den gowrak energiýa saklap bilýär — bu, mysal üçin, bir günüň dowamynda sowadyjy enjamyň işlemekligi üçin ýeterlikdir.
Şeýle netije betonyň gurluşynyň optimizasiýasy we degişli elektrolitiň saýlanylmagy arkaly gazanyldy. Elektrolit — sement elektrodlarynyň arasynda ýerleşýän, asetonnitril we dördünji amon duzlaryna esaslanýan organiki birleşme bilen siňdirilen gatlakdyr.
Materialyň mümkinçiliklerini görkezmek üçin MIT topary gadymy rim arhitektura usulynda bir arka gurdy. Bu arka diňe bir agrama garşy durnukly bolman, eýsem 9 V güýji bolan LED çyrasyny hem işletdi. Agram artdygyça LED çyrasy ýalpyldap başlady, bu bolsa alymlaryň pikiriçe, gurluşyň ýagdaýyny yzarlamak üçin peýdalanylyp bilner.
Alymlar bu tehnologiýanyň beton babatda garaýyşlary üýtgedip, ony adaty gurluşyk materialyndan täzeden dikeldilýän energiýa ulgamynyň bir bölegine öwrüp biljekdigine ynanýarlar.
