AMD-nyň (Advanced Micro Devices) paýnamalary OpenAI bilen uly şertnama baglaşylandygy belli bolandan soň 30%-den gowrak gymmatlady. Sem Altmanyň startapy çip öndürijisiniň paýnamalarynyň 10%-ine çenli satyn almak hukugyna eýe boldy we bu oňa serwislerini ösdürmek üçin hasaplaýyş güýçleriniň ýetmezçilik etmek meselesini çözmäge kömek eder.
Şertnamanyň şertlerine görä, OpenAI bir paý üçin 0,01 dollar bahadan AMD-yň 160 mln adaty paýnamasyny satyn alyp biler. Satyn alyş tapgyrlaýyn bolar we paýnamalaryň bahasyna hem-de OpenAI-iň AMD kompaniýasyndan Instinct tizleşdirijilerini näderejede işjeň satyn ýa-da kärendesine aljakdygyna bagly bolar. OpenAI şertleri doly berjaý eden ýagdaýynda AMD-yň paýnamalarynyň, takmynan, 10%-ini alar.
Hyzmatdaşlyk OpenAI-iň maglumat merkezlerinde umumy kuwwaty 6 GWt bolan AMD Instinct grafiki prosessorlaryny ýerleşdirmegi göz öňünde tutýar. Birinji tapgyrda 2026-njy ýylyň ikinji ýarymynda 1 GWt kuwwatly enjamlary gurnamak meýilleşdirilýär, şondan soň OpenAI bölünip berlen paýnamalaryň bir böleginden peýdalanyp biler.
OpenAI-iň prezidenti Greg Brokman hasaplaýyş güýçleriniň ýetmezçilik etmeginiň ChatGPT-niň täze funksiýalaryny we beýleki önümleri işe girizmekde päsgelçilik döredýändigini aýtdy. Kompaniýanyň wekili şertnamanyň bahasynyň “milliardlarça dollar” bilen bahalandyrylýandygyny habar berdi, ýöne takyk mukdary getirmedi.
OpenAI bilen hyzmatdaşlyk yglan edilenden soň, Nasdaq biržasynda AMD-yň paýnamalarynyň bahasy 37,6% ýokarlanyp, iň ýokary derejesinde 226,56 dollara ýetdi. Soňra ösüş 29%-e çenli peseldi.
