Her ýyl geçirilýän DevDay 2025 çäresinde OpenAI kompaniýasy ChatGPT-ni ulanyjylaryň göni çatda başga programmalary nädip işledip biljekdigini görkezdi. Häzir çat-botda Spotify, Figma, Booking.com, Expedia, Coursera, Zillow we Canva programmalary elýeterli.
Şeýle-de, OpenAI işläp düzüjiler üçin Apps SDK-nyň deslapky wersiýasyny hödürledi. Ol ChatGPT-niň içinde programma döretmäge mümkinçilik berýär diýip, TechCrunch habar berýär.
OpenAI-iň baş direktory Sem Altmanyň aýtmagyna görä, täze funksiýanyň maksady çat-boty iş, okuw we döredijilik üçin amatly etmekdir.
Täze ulgamda programmalar göni söhbetde, ýüzlenme setirinde çagyrylýar. Mysal üçin, eger “Figma, bu garalama nusgasyny iş diagrammasyna öwür” diýlip ýüzlenilse, çat-bot şol wagt Figma-ny açar. Eger ulanyjy dynç günleri oturylyşyk üçin pleýlist sorasa, ChatGPT Spotify programmasyny açyp biler.
Geljekde ChatGPT-de DoorDash, Instacart, Uber we AllTrails ýaly programmalar peýda bolar.
Täze programmalar ulgamy model kontekst protokolynda gurnaldy, ol EA-nyň maglumat çeşmelerine birikmegine mümkinçilik berýär. Programmalar hereketi ýerine ýetirip, interaktiw interfeýsi ChatGPT-niň jogaplarynda görkezip biler. Ulanyjylar goşmaça funksiýalara elýeterli bolmak üçin öz akkauntlaryna girip biler. Altman geljekde programmalar üçin ChatGPT-niň içinde pul gazanmak usullarynyň peýda bolup biljekdigini belledi.
