Türkmenistandan 8 okuwçy Germaniýanyň Bielefeld şäherinde geçirilen Ýetginjekleriň arasynda mental hasaplamak boýunça Dünýä çempionatynda üstünlikli çykyş etdiler. Çempionat 4-6-njy oktýabr aralygynda geçirildi.
Halkara ýaryşyň şertlerine laýyklykda, okuwçylar matematikanyň 23 temasyny öz içine alýan 30-a golaý sahypadan ybarat bolan soraglara 2 sagadyň dowamynda ýatdan dogry jogap bermek boýunça bäsleşdiler. Şeýle hem olara goşmaça 5 tema boýunça ýumuşlar tabşyryldy.
Çempionata Fransiýa, Çehiýa, Ýaponiýa, Hindistan, Meksika, Müsür, BAE, Günorta Afrika Respublikasy ýaly döwletleriň 20-sinden 100-den gowrak ýetginjek gatnaşdy. Türkmen okuwçylary “12 ýaşa çenli” hem-de “12-15 ýaş” toparlary boýunça gatnaşyp, ilkinji onluga girmegi başardylar.
Netijede,
- Mekan Nurgeldiýew, Lebap welaýatynyň Türkmenabat şäherindäki ýöriteleşdirilen 41-nji orta mekdebiniň okuwçysy, “Kämil bilim” okuw merkeziniň Türkmenabatdaky şahamçasynyň diňleýjisi, 12 ýaşa çenli çagalaryň arasynda toparda 2000-den ýokary bal gazanyp, 4-nji orna mynasyp boldy.
- Liwanur Berdiýewa, Aşgabat şäheriniň dil derslerini çuňlaşdyryp öwredýän ýöriteleşdirilen 87-nji orta mekdebiniň okuwçysy, “Kämil bilim” okuw merkeziniň diňleýjisi, 12-15 ýaşly ýetginjekleriň arasynda 2000-den ýokary bal gazanyp, 6-njy orna mynasyp bolmagy başardy.
- Patma Gündogdyýewa, Aşgabat şäheriniň takyk we iňlis dili derslerini çuňlaşdyryp öwredýän ýöriteleşdirilen 6-njy orta mekdebiniň okuwçysy, “Kämil bilim” okuw merkeziniň diňleýjisi, çempionatyň “Iň ýaş gatnaşyjy” Kubogyna mynasyp boldy.
Ýatladyp geçsek, Liwanur Berdiýewa mental hasaplamak boýunça ukyplary bilen "kalkulýator-gyzjagaz" adyny alypdy. Geçen ýyl Liwanur "Russiýa" teleýaýlymynda "Täsin adamlar" gepleşiginde tiz hasaplamakda ukyplaryny görkezip, gepleşigiň gahrymany boldy.
“Bu ýaryşda 2000-den köp bal gazanmak, ýokary netije hasaplanýar. Bu günki gazanylan netije geljekki üstünliklere tarap möhüm ädim boldy” – diýip, “Kämil bilim” okuw merkezleriniň direktorynyň orunbasary Döwletmyrat Durdymämmedow gürrüň berdi.
