Birleşen Arap Emirlikleriniň häkimiýeti täze wiza kategoriýalaryny girizdi we bar bolanlaryň şertlerini täzeledi. Bu barada Şahsyýet, raýatlyk, gümrük we port howpsuzlygy meseleleri boýunça federal edara salgylanyp, Gulf News habar berýär.
Emeli aň pudagyndaky hünärmenler indi bu ugurda işleýän guramadan ýa-da hemaýatkärden çakylyk bolan ýagdaýynda bir gezeklik ýa-da köp gezeklik wizalary resmileşdirip bilýär.
Täze “event visa” kategoriýasy daşary ýurtlulara festiwallara, konferensiýalara, sergilere we beýleki jemgyýetçilik çärelerine gatnaşmaga mümkinçilik berýär.
Ýük ulaglarynyň eýeleri ýerli iş bilen üpjün ediji, lukmançylyk ätiýaçlandyryşy bolan ýagdaýynda, şeýle-de gümrük paçlary we beýleki maliýe kepillikleri tölenen ýagdaýynda degişli wizany alyp biler.
Iş mümkinçiliklerini öwrenmek üçin ýurda gelmek isleýän daşary ýurtly telekeçiler üçin daşary ýurtlarda işiniň bardygyna tassyklamanyň ýa-da “ýeterlik” kapitalyň bolmagy talap edilýär.
Myhman wizasyny almak üçin garyndaşlaryny ýa-da dostlaryny çagyrýan adamlar maliýe howandarlygyny bermeli – girdejiniň iň pes çägi garyndaşlygyň derejesine bagly we 4-den 15 müň dirhama (takmynan, 1080-4080 dollar) barabar.
Mundan başga-da, bosgunlar üçin uzaltmak mümkinçiligi bilen birýyllyk berilýän ynsanperwer ýaşaýyş ygtyýarnamasy peýda boldy. Düzedişler BAE-niň raýaty ýa-da ýurtda ýaşaýan daşary ýurtly bilen durmuş gurandygyna garamazdan, dullaryň we aýrylyşan aýallaryň hem ýaşaýyş ygtyýarnamasyny almak mümkinçiligini göz öňünde tutýar.
Şol bir wagtyň özünde köp ýurtlaryň raýatlaryna häzirem BAE-niň çäginde wizasyz 30 günden 90 güne çenli galmaga rugsat berilýär.
