Spotify-nyň esaslandyryjysy we ýolbaşçysy, telekeçi Daniel Ek kompaniýanyň baş direktory wezipesinden gitmek kararyna gelendigini mälim etdi. Bu barada Forbes habar berýär.
Ek indi ýerine ýetiriji geňeş başlygy wezipesine geçer we kompaniýanyň uzak möhletli strategiýasyna hem-de esasy maýa goýumlaryna ünsi jemlär.
«Men 20 ýyl — bütin ömrümiň esasy bölegini diýen ýaly Spotify-nyň baş direktory hökmünde geçirdim. Indi men oýunçylykdan tälimçilige geçmäge taýýar» diýip, telekeçi aýtdy.
Häzirki wagtda Spotify-nyň prezidenti wezipesinde işleýän Alek Norstrýom we Gustaw Sederstrýom kompaniýanyň bilelikdäki baş direktorlary wezipesine belleniler. D.Ek soňky ýyllarda olary bu wezipä taýýarlapdy. Ýolbaşçylyk düzümindäki bu üýtgeşme 2026-njy ýylyň 1-nji ýanwaryndan güýje girer.
Spotify — 2006-njy ýylda Daniel Ek we Martin Lorenson tarapyndan döredilen striming görnüşli ses hyzmatydyr. Häzirki wagtda platformanyň 696 milliondan gowrak işjeň ulanyjysy bar. Kompaniýanyň 2024-nji ýyldaky girdejisi 18,36 milliard dollara deň boldy. Geçen ýylyň dowamynda Spotify-nyň aksiýalarynyň bahasy 100% ýokarlandy, onuň bazar bahasy bolsa 150 milliard dollardan geçdi. Forbes-iň maglumatlaryna görä, Daniel Egiň şahsy baýlygy 10,3 milliard dollar bilen bahalandyrylýar.
