Milanyň şäher geňeşi “San-Siro” stadionynyň ýerli “Inter” we “Milan” futbol klublaryna satylmagyny tassyklady. Bu barada La Gazzetta dello Sport habar berýär.
Çözgüt 30-njy sentýabra geçilen gijede bolan mejlisde kabul edildi, şertnamanyň bahasy 197 mln ýewro boldy.
Il Messaggero neşiriniň maglumatlaryna görä, bu meýdançada öý oýunlaryny geçirýän klublaryň ikisi-de ony ýykyp, täze, has döwrebap we rahat stadiony gurmagy meýilleşdirýär. Köne stadiony abatlamak işleri tehniki kynçylyklar sebäpli amatsyz hasaplandy.
Täze meýdançanyň gurluşygy 2027-nji ýylda başlar we 2032-nji ýylyň Ýewropa çempionatyna çenli tamamlanar. Ýykylmazdan ozal stadion ýene bir uly wakany kabul eder – 2026-njy ýylyň 6-njy fewralynda bu ýerde gyşky Olimpiýa oýunlarynyň açylyş dabarasy bolar.
“San-Siro” 1926-njy ýylda açyldy we iki gezek – 1956-njy we 1989-njy ýyllarda durky täzelendi. Ol 80 müňden gowrak tomaşaça niýetlenýär. Stadion 1934-nji we 1990-njy ýyllaryň dünýä çempionatlaryny, 1980-nji ýylda Ýewropa çempionatyny, şeýle-de Ýewropa çempionlarynyň kubogynyň iki finalyny we Çempionlar ligasynyň iki aýgytly oýnuny kabul etdi.
