Italiýanyň Sky telekompaniýasy Guççiniň maşgalasy barada serialyň taýýarlanýandygyny habar berdi. “Guççi: Oýun gutardy” (“Гуччи: Игра окончена”) atly alty bölümli taslamanyň surata düşürilişi 2026-njy ýylyň ýazynda başlanar diýip, Variety habar berýär.
Taslama Uill Smitiň baş keşbi janlandyrmagynda “Bagtyň yzynda çapyp” (“В погоне за счастьем”) we “Ýedi ömür” (“Семь жизней”) filmlerini surata düşüren Gabriel Muççino režissýorlyk eder. Filmiň edebi esasy Maurisio Guççi bilen Patrisiýa Rejaniniň gyzy Allegranyň ýatlamalaryna esaslanar.
Taslama käbir maşgala agzalarynyň arasynda jedel döreden “Guççileriň öýi” (“Дом Гуччи”) filmi çykanyndan dört ýyl soň döredilýär. Sky Studios-yň ýerine ýetiriji direktory Nils Hartmanyň sözlerine görä, täze serial ““Guççileriň öýüne” Allegranyň gözleri bilen italýan garaýşyny hödürlär”.
Ridli Skottuň "Guççileriň öýi" filminde 1995-nji ýylda Maurisio Guççiniň öldürilmegi barada gürrüň berilýär: ol ofisiniň ýanynda atylyp öldürilýär, bu ölümi sargyt etmekde onuň aýaly Patrisiýa Rejani günäkärlenýär, ol 18 ýylyny türmede geçirýär. Filmde baş keşplerde Adam Draýwer, Ledi Gaga, Jared Leto, Al Paçino we Jeremi Aýrons dagy çykyş edýärler.
