«Oskar» baýragyna mynasyp bolan «Çaknyşyk» (Столкновение) filminiň ssenariçisi Bobbi Moresko italýan modelýeri Jorjo Armani barada biografik film düşürer. Bu barada Deadline neşiri habar berýär.
Filmiň ady häzirlikçe— «Armani — modanyň şasy» diýlip goýuldy. Moresko ssenariniň üstünde gyzy Amanda bilen bilelikde işleýär. Taslamanyň prodýuseri — ozal režissýor bilen «Lamborgini: Rowaýata öwrülen adam» («Ламборгини: Человек-легенда») we «Mazerati» filmlerinde hyzmatdaşlyk eden Andrea Ýerwolino bolar.
Film Jorjo Armaniniň hünär ýoly barada — modadaky ilkinji ädimlerinden başlap, şu günki günde bahasy 10 milliard dollardan geçýän moda öýüniň döredilişine çenli gürrüň berer. Şeýle-de, surata düşüriljek eserde onuň XX we XXI asyrlaryň iň täsirli dizaýnerleriniň biri hökmünde tutýan orny görkeziler.
Sýužetiň aýratyn bir bölegi Armaniniň kino industriýasy bilen hyzmatdaşlygyna bagyşlanar. Ol 1980-nji ýylda surata düşürilen «Amerikan žigolosy» («Американский жиголо») filminde Riçard Gir üçin kostýumlary döretdi, şeýle-de Keýt Blanşett, Juliýa Roberts we Leonardo Di Kaprio ýaly ýyldyzlar bilen işleşdi.
Biografik filmiň surata düşüriljek ýeri heniz kesgitlenmedi. Mowzugyň Italiýa bilen baglydygyna garamazdan, filmiň Wengriýada düşürilmegi ähtimal.
«Men buýsançly italýan we dünýä meşhur italýan şahsyýetleriniň taryhlaryny gürrüň bermegi dowam ederin, emma, gynansak-da, häzirki wagtda olary daşary ýurtda surata düşürmäge mejbur bolýaryn» — diýip, prodýuser Andrea Ýerwolino belledi.
