Iň uly garaşsyz wideooýun çykaryjylaryň biri bolan Electronic Arts (EA) amerikan kompaniýasy 55 mlrd dollara maýadarlar konsorsiumynyň eline geçer. Satuw barada kompaniýanyň metbugat relizinde habar berildi.
Satyn alyjylar toparyna Saud Arabystanynyň Garaşsyz gaznasy (PIF), şeýle-de Silver Lake we Affinity Partners maýa goýum gaznalary girdi. Soňkusyna ABŞ-nyň Prezidenti Donald Trampyň giýewi Jared Kuşner eýeçilik edýär. RBK şertnamanyň hakyky bahasynyň 52,5 mlrd dollardygyny ýazýar. Bellemeli ýeri, PIF eýýäm EA-nyň paýnamalarynyň 9,9%-ine eýeçilik edýär.
EA şertnamanyň kompaniýanyň uzak möhletleýin strategiýasyny durmuşa geçirmegi çaltlaşdyrmaga we oýun pudagyny ösdürmäge kömek etjekdigini belleýär. Şertnama karz serişdelerini çekmek bilen taryhda iň uly satyn alyş bolar.
EA-nyň paýdarlary bir paý üçin 210 dollar alar – bu 25-nji sentýabrda söwdanyň ýapylyşyndaky 168 dollar bahadan 25% köpdür. Kompaniýanyň müdirler geňeşi eýýäm şertnamany makullady.
Şertnamanyň 2027-nji ýylyň birinji maliýe çärýeginde ýapylmagyna garaşylýar. Şondan soň EA hususy kompaniýa bolup, biržadan gider.
Electronic Arts 1982-nji ýylda esaslandyryldy we iň uly garaşsyz wideooýun çykaryjylaryň biri bolmagynda galýar. Onuň iň belli oýunlarynyň arasynda FIFA, Battlefield, The Sims we Need for Speed bar.
Bloomberg satmak kararynyň pandemiýa döwründe güýçli ösüşden soň oýun pudagynyň ösüşiniň haýallamagy sebäpli kabul edilendigini belleýär.
