Kanadaly režissýor Deni Wilnýow indiki ýyl çykjak “Dýunanyň” üçünji bölüminiň üstündäki işleri tamamlandan soň, Jeýms Bonduň keşbi üçin täze aktýor gözläp başlar. Deadline-yň maglumatlaryna görä, döredijiler täze hekaýatda içalynyň keşbi üçin “täze ýüz” gözleýär.
Dalaşgäre bildirilýän esasy talap, personažy döreden Ýan Flemingiň isleýşi ýaly, asly britaniýaly bolmagydyr. Bu Timoti Şalame, Ostin Batler ýa-da Jeýkob Elordi ýaly aktýorlary sanawdan aýyrýar. Iň gowy dalaşgär – Flemingiň suratlandyryşy ýaly, 007 agentini “hünärmen ganhor” we “aşa ýürekgysgynç adam” hökmünde görkezip biljek 30 ýaş töweregindäki o diýen belli bolmadyk aktýordyr. Bu Tom Hardi (47 ýaş), Idris Elba (53 ýaş) we Genri Kawill (42 ýaş) ýaly meşhur britaniýaly aktýorlaryň hem taslama gatnaşmak mümkinçiligini aradan aýyrýar.
Geljekki film üçin ssenarini “Kesgir gaşlary” (Острые козырьки) döreden Stiwen Naýt ýazar. Ol 007 agentiniň hakyky obrazyny gaýtadan döretmek üçin Flemingiň irki romanlaryna daýanmagy meýilleşdirýär.
Filmiň önümçiligi 2027-nji ýylda başlar, premýera 2028-nji ýylda bolar. Habar çeşmeleri täze filmiň aýratyn garaşsyz hekaýat boljakdygyny we “Ölmegiň wagty däl” (Не время умирать) filminiň wakalary bilen baglanyşykly bolmajakdygyny habar berýär.
