22–24-nji sentýabr aralygynda türkmenistanly hünärmenler Italiýada bolup, tehnologik energiýa seýilgähleriniň dörediliş tejribesini öwrendiler. Sapar ÝHHG-niň Aşgabatdaky merkezi tarapyndan guraldy.
Türkmenistanyň Döwlet energetika institutyň wekilleri Ýewropa Komissiýasynyň Bilelikdäki gözleg merkeziniň hem-de Milan Politehniki uniwersitetiniň alymlary bilen duşuşyklary geçirdiler. Duşuşyklarda energiýa seýilgähleriniň işiniň guramaçylyk, hukuk we tehnologik aýratynlyklary ara alnyp maslahatlaşyldy.
Turin şäherindäki Parco Scientifico Tecnologico per l'Ambiente (Ekologik ylmy-tehnologik seýilgäh) sapara gatnaşyjylaryň ünsüni aýratyn özüne çekdi. Bu seýilgäh 1990-njy ýyllaryň ahyrynda öňki senagat ýerleriniň binýadynda döredilip, häzirki wagtda gaýtadan dikeldilýän energiýa, innowasiýalar we ekologiýa durnuklylygy boýunça 600-den gowrak hünärmeni birleşdirýär. Ol köne senagat zolaklarynyň häzirki zaman ylmy-barlag merkezlerine üstünlikli öwrülişiniň nusgasy hasaplanýar.
ÝHHG-niň Aşgabatdaky merkeziniň hünärmeni Oliwer Žurowas-Kuzman bu saparyň Türkmenistanyň gaýtadan dikeldilýän energiýa pudagyny ösdürmekde möhüm ähmiýete eýedigini nygtady. Ol saparyň ýurtda täze kabul edilen «Energiýany tygşytlamak we energiýa netijeliligini ýokarlandyrmak hakyndaky» Kanun bilen aýratyn baglanyşyklydygyny belledi.
