Teýlor Swiftiň "The Life of a Showgirl" täze albomy bilen bagly geçiriljek kinogörkeziş diňe deslapky sargytlaryň ilkinji gününde 15 mln dollar girdeji getirdi. Aýdymçynyň 20-nji studiýa albomynyň ilkinji görkezilişi 3-nji oktýabra meýilleşdirilýär we uly girdejili çärä öwrüler diýlip garaşylýar.
Ýakynda Swift 3–5-nji oktýabr aralygynda geçiriljek 89 minutlyk “Taylor Swift: The Official Release Party of a Showgirl” atly “kino agşamyny” yglan edipdi. Bu ýerde esasy singl "The Fate of Ophelia" üçin düşürilen täze klip, sahna aňyrsyndaky materiallar we täze aýdymlaryň sözleri ilkinji gezek görkeziler.
Bilermenleriň çaklamasyna görä, ABŞ-da ilkinji dynç alyş günlerinde girdejiler 30–50 mln dollara çenli ýetip biler. Mundan ozal aýdymçynyň Eras Tour atly konsert filmi dünýä boýunça 267,1 mln dollar toplap, öz žanrynda iň girdejili film bolupdy.
Görkezişler diňe ABŞ-da däl, eýsem Kanadada, Meksikada, Ýewropa ýurtlarynda, Günorta Afrikada, Awstraliýada we Täze Zelandiýada hem geçiriler. Biletler 23-nji sentýabrdan satuwa çykaryldy.
Geljekki albom Swift tarapyndan meşhur prodýuserler Maks Martin we Shellback bilen bilelikde taýýarlanyldy. Albomda Sabrina Karpenter bilen duet hem bar. Swiftiň aýtmagyna görä, bu iş onuň Eras Tour atly uly gastrol saparynyň dowamynda başdan geçiren şahsy duýgularyny şöhlelendirýär. Albom Şwesiýada konsertleriň aralygynda ýazgy edilipdir.
