BMW X5 krossoweriniň täze görnüşini hödürledi. Ol markanyň ilkinji modeli bolup, bäş dürli güýç ulgamynda elýeterli bolar: elektrik, tokdan zarýad edilýän gibrid, benzinli, dizelli we hatda wodorodly.
Kompaniýanyň metbugat gullugy wodorod ýangyç elementlerinden alnan elektrik energiýasynda işleýän ulgam bilen enjamlaşdyrylan, üsti örtülen bäşinji nesil X5-iň suratlaryny paýlaşdy.
BMW iX5 Hydrogen-iň ilkinji görkezilişi 2028-nji ýyla meýilleşdirilýär. Ýangyç elementli ulgamlaryň tapgyrlaýyn öndürilişi Awstriýanyň Ştaýr şäherindäki zawodda ýola goýlar. Şeýle-de kompaniýanyň wekilleri BMW-niň Ýewropada wodorod dolduryş stansiýalarynyň ulgamyny giňeldýändigini aýtdylar.
iX5 Hydrogen-iň hereketlendiriji ulgamy BMW-niň Toyota bilen hyzmatdaşlykda taýýarlap ýören üçünji nesil ýangyç elementlerine esaslanýar. Markanyň bellemegine görä, täze güýç ulgamy öňkülerden has kiçi göwrümli, has kuwwatly we energiýa sarp edilişinde tygşytlydyr.
BMW-niň wodorod ulgamlarynyň ilkinji nesli 2014-nji ýylda ýörite çykarylan 535iA modelinde peýdalanyldy we dolulygyna Toyota tarapyndan üpjün edilýärdi. Ikinji nesil bolsa 2023-nji ýylda X5-iň öňki nesiline esaslanan az möçberde öndürilen iX5 Hydrogen modelinde ulanyldy we esasan synag üçin niýetlenendi.
