Beýik Britaniýada XVI asyryň ortasynda gurlan gadymy Danski galasynyň satuwy barada bildiriş peýda boldy. Gala deňziň gyrasyndaky beýik gaýada ýerleşýär we internet ulanyjylary onda arwahlaryň bardygyny aýdýar diýip, The Mirror habar berýär.
Danski şol döwrüň binagärlik ýadygärlikleriniň sanawyna girizildi we 1500-nji ýylda ýumrulan has irki Ader galasynyň ýerinde dur. Ol Portpatrik bilen Morrohyň arasyndaky kenarýaka ýolunda, çet ýerde ýerleşýär, bu hem oňa taryhy gözelligi berýär. Açyk howada bu ýerden deňzi we hatda 32 km-den gowrak uzaklykda ýerleşýän Demirgazyk Irlandiýany görmek bolýar.
Gala birwagt öz bitewiligini ýitirdi. Harabalyga Ader galasyndan saklanyp galan gorag garymyndan geçýän kenarýaka ýodasy boýunça baryp bolýar. Saklanyp galan diwarlaryň ýogynlygy 152 sm, binanyň beýikligi 30 m ýetýär. Gümmezli ýerzeminiň we gözegçilik diňiniň hem bölekleri galypdyr. Gala, takmynan, 1700-nji ýyldan bäri taşlangy dur we häzir syýahatçylar üçin özüne çekiji bina hasaplanýar.
Taryhy desga Strutt and Parker kompaniýasy tarapyndan satuwa çykaryldy. Onuň bahasy azyndan 100 müň funt sterlinge (takmynan, 135 müň dollar) barabar.
Rowaýatlaryň birine görä, bu galanyň ýerzeminlerinde gizlin tunneli tapan şahyr-sazanda saklanypdyr. Tupanly gijelerde bu ýerde deňiz tolkunlarynda onuň fleýtasynyň sesi eşidilýärmiş. Stories Collection saýtynda onuň deňziň kenaryndaky gowakdan çykyp bilmän, kösenip aradan çykandygy, onuň ruhunyň bolsa gijelerine galada gezmeleýändigi gürrüň berilýär.
