23-nji sentýabrda Gyrgyzystanyň paýtagty Bişkek şäherinde Merkezi Aziýa döwletleriniň III Parlamentara forumy geçirildi. Oňa sebitiň döwletleriniň parlament ýolbaşçylary gatnaşdylar. Türkmenistana bu çärede ýurdumyzyň ilçisi Nury Gölliýew wekilçilik etdi.
Forumyň gün tertibine parlamentara hyzmatdaşlygyň ösdürilmegi, ykdysady hyzmatdaşlyk, migrasiýa prosesleriniň düzgünleşdirilmegi we sanlylaşdyrma meseleleri girizildi.
Türkmen tarapy goňşuçylyk syýasatyna hem-de konstruktiv hyzmatdaşlyga ygrarlydygyny belläp, parlamentleriň diplomatiýasynyň sebitleýin parahatçylygy, durnuklylygy we ynamy pugtalandyrmakdaky ähmiýetine üns çekdi. Şeýle-de 2025-nji ýylyň Türkmenistanyň başlangyjy bilen BMG-niň Baş Assambleýasy tarapyndan Parahatçylyk we ynanyşmak ýyly diýlip yglan edilendigi, şeýle hem ýurdumyzyň hemişelik Bitaraplygynyň 30 ýyllygynyň dabaraly belleniljekdigi aýratyn nygtaldy.
Forumyň netijeleri boýunça gatnaşyjylar Bişkek Jarnamasyna gol çekdiler. Onda Merkezi Aziýa döwletleriniň parlamentara dialogy ösdürmäge, ykdysady hyzmatdaşlygy güýçlendirmäge we sebitde durnukly ösüş üçin bilelikdäki çözgütleri gözlemäge ymtylýandygy beýan edildi.
Indiki, IV Parlamentara forumyny Täjigistanda geçirmek kararyna gelindi.
