Alphabet-iň golçur kompaniýasy bolan Google Afrikada dört sany täze infrastruktura merkezini gurmagy meýilleşdirýär. Olar kompaniýanyň iň täze suwasty optiki süýümli kabellerini yklymyň dürli sebitlerine - demirgazyga, günbatara, günorta we gündogara birikdirerler. Bu barada Google-yň Afrika boýunça dolandyryjy müdiri Aleks Okosi Bloomberg teleýaýlymyna beren interwýusynda habar berdi.
Onuň sözlerine görä, Afrika emeli aňyň ulanylmagy üçin uly mümkinçilikleri hödürleýär. "AI-niň mümkinçiliklerini durmuşa ornaşdyrmak üçin Afrika maýa goýmak biziň üçin möhümdir" – diýip, Okosi belledi.
Bu merkezlere suwasty kabelleriň işlemegi üçin zerur bolan ýerüsti stansiýalar we maglumat merkezleri girýär. Okosiniň sözlerine görä, bu "täze maýa goýumlardyr" we tehnologiýa ägirdiniň 2021-nji ýylda Afrikanyň ösüşi üçin bäş ýylyň dowamynda 1 milliard dollar bölüp bermek baradaky wadasy agzalan mukdardan geçdi.
Taslama hyzmatlaryň gymmat we ygtybarsyz bolmagynda galýan yklymyndaky internet birikmesini gowulandyrmagy maksat edinýär, ondaky bökdençlikler köplenç suwasty kabelleriň zaýalanmagy sebäpli ýüze çykýar.
Üstümizdäki ýylda Google Afrikada iki sany iň täze kabeli – Equiano-ny we Umoja-ny goýmagy meýilleşdirýär. Merkezleriň gurluşygynyň üç ýylyň içinde tamamlanmagyna garaşylýar. Bu müşderiler üçin giň zolakly internete elýeterliligiň çykdajylaryny azaltmaga kömek eder diýlip garaşylýar.
