20-nji sentýabrda Gazagystanda 12 ýurtdan gelen aýdymçylaryň gatnaşmagynda Silk Way Star atly aýdym-sazly bäsleşik başlandy. Bu bäsleşikde Türkmenistanyň adyndan aýdymçy Döwran Şammyýew çykyş edýär.
Ilkinji epizodda D.Şammyýew özüniň «Eşidýäňmi olary?» atly awtorlyk aýdymyny ýerine ýetirip, 120 bal toplady we liderleriň üçlügine girdi. Birinji orny Malaýziýadan gatnaşan Ýazmin Aziz (126 bal), ikinji orny bolsa Özbegistandan gelen Madinabonu Adylowa (122 bal) eýeledi.
Bäsleşikde öňde ýene 9 epizod bar. Onda gatnaşyjylara dürli ýumuşlar, medeniýetara duetler, dürli dillerde aýdymlar garaşýar. Umuman, taslama 10 epizoddan ybarat bolup, her biriniň dowamlylygy 100 minutdan köpdür.
Gepleşik her hepde görkeziler, ähli gatnaşyjy ýurtlaryň tomaşaçylary bolsa onlaýn ses bermäge gatnaşyp bilerler.
22-nji noýabrda Jibek Joly teleýaýlymynda we bäsleşige gatnaşyjy ýurtlaryň esasy teleýaýlymlarynda göni efirde geçiriljek uly finalda ýeňiji 50% eminler toparynyň karary, 50% tomaşaçylaryň onlaýn ses bermegi boýunça kesgitlener.
Öň habar berşimiz ýaly, halkara eminler toparynyň düzümine Türkmenistanyň at gazanan artisti Rasul Klyçew hem girýär.
