Arheologlar Şotlandiýanyň günbatar kenarynda ýitirilen diýlip hasaplanan orta asyr galasyny we patyşalyk köşgüni tapdy. Açyş Makdonaldlar urugynyň galasy baradaky rowaýatlaryň hakykatdygyny tassyklady diýip, BBC News habar berýär.
Tapyndy Gebrid arhipelagynyň Aýla adasyndaky Finlagganyň çäklerinde ýüze çykaryldy. Bu taryhçylaryň we arheologlaryň 30 ýyldan gowrak dowam eden gözlegleriniň netijesi boldy.
Gala Makdonaldlar urugynyň ata-babalary tarapyndan XII-XIII asyrlarda gurlupdyr. Iki ýüz ýyldan soň olaryň nesilleriniň täsiri ýokary derejä ýetýär we olar Adalaryň lordlary titulyny alýar. Şeýlelik bilen, olar Şotlandiýanyň hem Angliýanyň patyşalary bilen bäsleşip başlaýar.
Binagärlik toplumy köldäki iki sany kiçi adada ýerleşipdir. Olaryň birinde ýaşaýyş otaglary bilen uly daşdan diň, beýlekisinde bolsa howlular, aşhanalar, ussahanalar we meýlis zaly ýerleşipdir. Diň baýlygyň we hökmürowanlygyň nyşany bolup, öz gerimi boýunça Britaniýadaky we Irlandiýadaky iňlis-fransuz monarhlarynyň binalary bilen deňleşipdir. Bu onuň eýeleriniň ýokary statusynyň bolandygyny görkezýär.
Takmynan, XIV asyrda gadymy gala sökülip, onuň deregine täze köşk galdyrylypdyr. Hut şol ýerden Adalaryň lordlary Gebridleri, Argaýly we demirgazyk-günbatar Haýlendiň bir bölegini dolandyrypdyr.
