Türkmenistanyň we Özbegistanyň kinematograflarynyň hyzmatdaşlykda döreden «Magtymguly Pyragy» çeper filmi Bolgariýada geçirilen XIII Halkara «Slavýanska prikazka» kinofestiwalynyň baş baýragyna mynasyp boldy. Bu barada festiwalyň resmi Facebook sahypasynda habar berildi.
Film tomaşaçylary XVIII asyra alyp gidýär, türkmen şahyry we pelsepeçisi Magtymguly Pyragynyň durmuşyny beýan edýär. Kinoda onuň Buharadaky Gögeldaş medresesine hem-de Hywadaky Şirgazy han medresesine baran ýoly görkezilýär.
Filmiň režissýory hökmende özbegistanly Muzaffar Erkinow çykyş etdi. Esasy roly türkmen artisti Ahmet Amanmyradow ýerine ýetirdi, şahyryň kakasy Döwletmämmet Azadynyň keşbini bolsa Türkmenistanyň halk artisti Çary Berdiýew janlandyrdy.
Bu baýrak film üçin soňky bir ýylyň dowamynda halkara derejesinde alan ilkinji baýragy däl. Mundan ozal ol Londonda we Kazanda hem ýokary derejede bellenip geçilipdi, şeýle hem IV Halkara Gorkut ata kinofestiwalynyň iň gowy sungat filmi diýen ada mynasyp bolupdy.
Çeşmäniň maglumatyna görä, filmiň Bolgariýada gazanan üstünligi döredijileriň ýokary ussatlygyny hem-de halkara jemgyýetçiliginiň Türkmenistanyň we Özbegistanyň medeni mirasyna bolan gyzyklanmasynyň artýandygyny görkezýär.
