ABŞ-nyň Prezidenti Donald Tramp daşary ýurtly ýokary hünärli hünärmenleri işe almaga mümkinçilik berýän H-1B wiza programmasyna täzeden seretmek barada buýruga gol çekdi. Bu programma, aýratyn-da, tehnologiýa kompaniýalarynyň arasynda uly islegden peýdalanýar diýip, Reuters we Bloomberg habar berýärler.
Indiden soň programma gatnaşmak üçin arza tabşyrylanda 100 müň dollar tölemeli bolar. Bu töleg bolmasa, H-1B wiza arkaly ABŞ-nyň çägine girmek mümkin bolmaz. Şu wagta çenli umumy ýygymlar takmynan 1500 dollara barabardy. Täze töleg öňkülere goşmaça bolup girizilýär.
Reuters-iň maglumatyna görä, üýtgeşmeler esasan tehnologiýa pudagyna täsir eder. Amerikanyň kompaniýalary bu programmanyň çäginde Hindistandan we Hytaýdan köp sany ýokary hünärli işgärleri özüne çekýär. Microsoft, JPMorgan we Amazon ýaly iri kompaniýalar eýýäm H-1B wizasy bilen işleýän işgärlerine ABŞ-dan çykmazlygy maslahat berdiler, daşary ýurtda bolýan işgärlerine bolsa 21-nji sentýabrda düzgün güýje girmezden öň yzyna dolanmagy maslahat berdiler.
Şol bir wagtda Tramp ýene bir buýruga hem gol çekdi. Olaryň biri Trump Gold Card («Trampyň Altyn karty»), beýlekisi Trump Platinum Card («Trampyň Platina karty») diýlip atlandyrylýar. Birinjisi bir million dollar tölän ýagdaýynda çaltlandyrylan tertipde ýaşaýyş ygtyýarnamasyny (Ýaşaýyş rugsady) berýär. Ikinjisi bäş million dollar üçin ýaşaýyş ygtyýarnamasyny berýär, ýöne şol bir wagtda onuň eýeleri ABŞ-dan daşary alnan girdejilerine salgyt tölemekden boşadylýar.
Hökümet H-1B programmasyndaky özgertmeleri bu wizalary ulanmakdaky hyýanatçylyklar we amerikan işgärleriniň iş bazaryndan çykarylmagy bilen düşündirýär. Karar eýýäm Trampyň prezidentlik kampaniýasyna işjeň goldaw beren tehnologiýa pudagynda giňden ara alnyp maslahatlaşylýar.
Bu özgertme Trampyň administrasiýasynyň migrasiýa syýasatyny has-da berkidýän nobatdaky ädimi boldy. Mundan ozal ABŞ, beýleki çäreleriň arasynda, syýahatçylyk we okuw wizalarynyň berliş düzgünlerini hem berkidipdi. Şeýle hem “grin-kart” lotereýasyna gatnaşmak üçin ýygymlary girizmäge taýýarlanylýar.
