Apple-iň täze smartfonlary satuwyň başynda uly isleg döretdi. Bloomberg-iň maglumatlaryna görä, iPhone 17 Pro we iPhone 17 Pro Max has ýokary islegden peýdalanýar. Inçe iPhone Air smartfonyny bolsa ulanyjylar, esasan, bilesigelijilikden satyn alýar.
Birnäçe ýurtlarda Pro modellerine garaşmagyň möhleti dört hepdä çenli uzaldy. Käbir sebitlerde bolsa smartfonlary derrew almak bolýar: mysal üçin, Ýaponiýada sargyt eýýäm şu hepdäniň dowamynda eltip berilýär. Gonkongda iPhone Air-i, eger ätiýaçlykda bar bolsa, göni dükandan alyp bolýar, ýöne iPhone 17 Pro üç hepde diýen ýaly garaşmak bilen diňe onlaýn arkaly elýeterlidir.
Awstraliýada, Täze Zelandiýada, Hytaýda we Singapurda ýagdaý has kyn, bu ýerde Pro Max üçin bir aý garaşmaly. Günorta Koreýada iPhone 17 Pro bir hepdäniň dowamynda eltip berilýär, ýöne has ýokary wersiýa diňe oktýabryň ahyrynda satuwa çykar.
Pro wersiýalarynyň şeýle meşhurlygy smartfonlaryň täzelenen dizaýny, alýumin korpusy, şeýle-de ulaldylan batareýa, giňeldilen ýat we täze kameralar ýaly aýratynlyklary bilen baglanyşdyrylýar. Şol bir wagtyň özünde, iPhone 17 Pro öňki modelden bary-ýogy 100 dollar gymmat, bu hem onuň ýene bir özüne çekiji tarapy boldy.
iPhone Air barada aýdylanda, inçe korpus ulanyjylar üçin esasy artykmaçlyk bolmady. Smartfonyň bahasy Pro ýaly ýokary bolsa-da, batareýasy we kameralary gowşak gelýär. Umuman aýdanyňda, ol meşhur bolup bilmedik Samsung S25 Edge-iň ykbalyny gaýtalaýar.
