Italiýa Ýewropa Bileleşiginde emeli aňyň ulanylyşyny düzgünleşdirýän kanuny tassyklan ilkinji ýurt boldy. Bu barada The Guardian habar berýär.
Resminamanyň maksady innowasiýalara, kiberhowpsuzlyga we şahsy maglumatlaryň goragyna aýratyn üns bermek bilen, EA-nyň aç-açan we howpsuz ulanylmagyna ýardam etmekdir.
Kanun emeli aňy zyýan ýetirmek, mysal üçin, dipfeýk döretmek üçin ulanan ýagdaýlarynda bir ýyldan bäş ýyla çenli möhlet bilen azatlykdan mahrum etmegi göz öňünde tutýar. Şeýle-de, kezzaplyk we neýroulgamlaryň kömegi bilen şahsy maglumatlaryň ogurlygy üçin jeza güýçlendirilýär. 14 ýaşa çenli çagalar şeýle tehnologiýalara diňe ene-atasynyň razylygy bilen elýeterli bolup biler.
Resminama EA-nyň kömegi bilen döredilen eserleriň, eger olar adamyň hakyky intellektual tagallalarynyň netijesi bolsa, awtorlyk hukuklary bilen goraljakdygyny belleýär. Emeli aňyň kömegi bilen maglumatlaryň seljermesi diňe awtorlyk hukugy bilen goralmadyk kontent ýa-da ylmy gözlegler üçin rugsat edilýär.
