ABŞ-dan dört gezek Olimpiýa çempiony Sidni Maklaflin-Lewron Tokioda geçirilýän ýeňil atletika boýunça dünýä çempionatynda 400 metr aralyga ylgamakda altyn medal gazandy. Onuň netijesi 47,78 sekunt bolup, bu dünýä çempionatynyň rekordy we taryhda ikinji görkezijidir.
Amerikaly ylgawça 40 ýyl ozal germaniýaly Marita Koh tarapyndan goýlan öňki rekorda ýetmek üçin bary-ýogy 0,18 sekunt ýetmedi. Ýöne Kohyň biografiýasynda doping ulanmakda ençeme gezek aýyplamalar bar.
Finalda kümüş medaly 47,98 sekunt netije bilen Dominikan Respublikasyndan häzirki Olimpiýa çempiony Marileýdi Paulino gazandy. Bu görkeziji taryhda üçünji boldy. Bürünç baýragy 48,19 sekunt wagty görkezen Bahreýnden Salwa Eýd Naser aldy. Ylgaw ýagyşly howada geçirildi.
26 ýaşly Maklaflin-Lewron üçin esasy dissiplina päsgelçilikli 400 metre ylgawdyr. Hut bu ýerde oňa dünýä rekordy degişli. Bu aralykda türgen Olimpiýa oýunlarynyň iki altyn medalyny (Tokio-2020 we Pariž-2024), şeýle-de dünýä çempionatynyň altyn we kümüş medallaryny gazandy. Mundan başga-da, ol 4×400 metr estafeta ýaryşynda dört gezek ýeňiji boldy – iki gezek Olimpiadada we iki gezek dünýä çempionatynda. Tekiz 400 metre ylgaw ýaryşynda Maklaflin-Lewron ABŞ-nyň iki gezek çempiony boldy.
