18-nji sentýabrda Türkmenistanyň Bilim ministrliginde Britaniýanyň AQA Global Assessment Services kompaniýasynyň wekiliýeti bilen duşuşyk geçirildi. Wekiliýetiň düzümine halkara ösüş boýunça direktor Şon Krouli, baha bermek ulgamlarynyň direktory Anna Grin we sebit boýunça geňeşçi Wali Guseýin girdi.
Duşuşykda bilimiň hilini ýokarlandyrmak, talyplaryň bilimini bahalandyrmak ulgamyny kämilleşdirmek we ony zähmet bazarynyň talaplaryna laýyklaşdyrmak boýunça strategik hyzmatdaşlygyň mümkinçilikleri ara alnyp maslahatlaşyldy.
AQA Global kompaniýasy bilim ulgamy boýunça halkara tejribelere eýe bolup, Merkezi Aziýa ýurtlaryny hem öz içine alýan birnäçe ýurtlarda özgertmeler gatnaşdy. Esasy ugurlary — milli attestasiýa ulgamlaryny ornaşdyrmak, hünärleriň standartlaşdyrylmagy, testleşdirmäniň sanlylaşdyrylmagy we mugallymlara usuly taýdan goldaw bermekden ybaratdyr. Mysal üçin, kompaniýa Özbegistanda ýokary synplar üçin täze baha bermek modeliniň döredilmegine gatnaşdy, Gazagystanda bolsa uçurymlar üçin kriteriýal bahalandyrma ulgamyny ornaşdyrmaga ýardam etdi. Şeýle çemeleşmeler diplomlara we sertifikatlara bolan ynamy güýçlendirýär we olaryň iş berijiler tarapyndan has islegli bolmagyna ýardam edýär.
Gepleşikleriň dowamynda hyzmatdaşlygyň möhüm ugurlary kesgitlenildi:
- synag platformalaryny we sertifikasiýany guramak,
- netijeleri seljermek üçin sanly çözgütleri ornaşdyrmak,
- baha bermek we hünär standartlaryny bilelikde taýýarlamak,
- mugallymlara usuly taýdan goldaw bermek.
Taraplar halkara ülňülerine laýyklykda bilim ulgamyny meýilleşdirmegiň ähmiýetine aýratyn üns berdiler. Bu bolsa geljekde durnukly we netijeli özgertmeler modelini döretmäge ýardam berer.
