Aşgabatda käbir köçelerde we şaýollarda ulaglaryň hereketi wagtlaýyn çäklendiriler. Bu çäreler Türkmenistanyň Bitaraplygynyň 30 ýyllygyny baýram etmek boýunça taýýarlyklaryň çäginde paýtagtymyzy abadanlaşdyrmak maksady bilen geçirilýär diýip, şäher häkimligi habar berýär.
Şäher häkimliginiň bellemegine görä, hereket çäklendirmeleri 2025-nji ýylyň sentýabr–noýabr aýlary aralygynda tapgyrlaýyn giriziler. Iň uzak dowam etjek wagtlaýyn çäklendirme Bitarap Türkmenistan şaýolunda bolup, 30-njy oktýabra çenli dowam eder.
Wagtlaýyn çäreler Aşgabadyň beýleki merkezi köçelerine hem täsir eder. Olaryň arasynda Saparmyrat Türkmenbaşy, Magtymguly, Garaşsyzlyk şaýollary, şeýle hem Alyşir Nowaýy we Görogly köçeleri bar. Abadanlaşdyryş işleri bölekleýin alnyp barlar — käbir ýerlerde birnäçe kwartal boýunça, beýleki ýerlerde bolsa tutuş ýollar boýunça ýerine ýetiriler.
Şäheriň ýaşaýjylaryna we myhmanlaryna syýahatlaryny meýilleşdirende täze şertleri göz öňünde tutup, öňünden aýlawly ugurlary saýlamak maslahat berilýär.
