Awstraliýanyň klimat gullugy global ýylamanyň netijeleri barada çaklamasyny hödürledi. Maglumatlara görä, 2050-nji ýyla çenli umman derejesiniň ýokarlanmagy ýurduň 1,5 million ýaşaýjysynyň janyny howp astyna goýup biler diýip, The Guardian habar berýär.
2090-njy ýyla çenli suw basyp almak howpy abanýan kenarýaka sebitlerinde ýaşaýan adamlaryň sany 3 milliondan geçip biler.
Awstraliýanyň premýer-ministri Entoni Albaneze şeýle çaklamany howsala dörediji duýduryş diýip atlandyrdy. Ol düýpli çäreleri görmegiň we tertipleşdirilen energetika geçişini meýilnamalaşdyrmagyň zerurdygyny belledi. Şeýle-de, alymlar Sidneýde yssy howa bilen baglanyşykly ölüm sanynyň 444%, Darwinde 423% ýokarlanyp biljekdigini duýdurýar.
Hünärmenleriň hasaplamalary boýunça, howanyň üýtgemegi ykdysadyýete hem uly täsir eder. Eýýäm 2050-nji ýyla çenli suw joşgunlarynyň, tokaý ýangynlarynyň, tupanlaryň we siklonlaryň netijeleri bilen göreş üçin çykdajylar, ortaça temperatura 1,5 gradus ýokarlansa-da, ýylda 40 mlrd dollara ýetip biler.
Howanyň üýtgemek meseleleri boýunça ministr Kris Bouen howanyň üýtgemeginiň, haýsy sebitde ýaşaýandygyna garamazdan, ýurduň ähli ýaşaýjylaryna täsir etjekdigini belledi.
