2025-nji ýylyň awgust aýynda dünýäde 1,7 million gibrid we elektrik ulagy satyldy. Bu geçen ýylyň awgust aýy bilen deňeşdirilende 15% köp. Ýylyň başyndan bäri satuw 25% ýokarlandy, ýöne esasy ösüş iň uly bazarlaryň daşyndaky sebitlerde bolup geçdi diýip, Rho Motion seljeriş kompaniýasynyň maglumatlaryna salgylanýan Electrek neşiri ýazýar.
Awgust aýynda satuwyň mukdary, iýul bilen deňeşdirilende, 5% ýokarlandy. Akkumulýator bilen işleýän elektrik ulaglary 1,16 million, zarýad berilýän gibridler bolsa 570 müň boldy. Ýanwar-awgust aýlarynda ulaglaryň jemi 12,5 million sanysy satyldy.
Şol bir wagtyň özünde bazaryň ösüşi deň derejede däl. Demirgazyk Amerikada ABŞ-da ýerli ýygnalan elektrik ulaglaryna subsidiýa bermek maksatnamasynyň ýakyn wagtda ýapyljakdygy sebäpli satuw rekord derejä ýetdi. Kanadada, tersine, döwlet goldaw maksatnamalary togtadylandan soň, ýylyň başyndan bäri üçden bir esse peselendigi hasaba alyndy.
Ýewropada ösüş has berk daşky gurşaw talaplary bilen şertlendirildi. Germaniýada we Angliýada satuwlar degişlilikde 45% we 31% ýokarlandy. Ispaniýada bu görkeziji iki esse artdy, Italiýada 41%, Fransiýada bolsa 9% ösüş bilen çäklendi.
Umuman aýdanyňda, dünýä bazary 25% ösüp, 12,5 million awtoulag boldy. Ýewropada satuw 31% (2,6 million), Demirgazyk Amerikada - 6% (1,3 million) ýokarlandy. Beýleki ýurtlarda ösüşiň umumy mukdary 1 million ulag boldy, şeýlelikde ösüşiň depgini 44 göterime ýetdi.
