Ilon Mask soňky bäş ýylyň içinde ilkinji gezek Tesla kompaniýasynyň paýnamalaryny açyk bazardan satyn aldy. Telekeçi jemi 1 milliard dollarlyk 2,57 million paýnamany satyn aldy. Bu Teslanyň taryhynda iň uly insaýder satyn alşydyr diýip, ABŞ-nyň Gymmatly kagyzlar we biržalar komissiýasynyň (SEC) hasabatyna salgylanýan CNBC habar berýär.
Geleşikden soň kompaniýanyň paýnamalary ýokarlandy: 12-nji sentýabrda, anna güni söwdanyň ahyrynda olaryň bahasy 7,35% ýokarlandy we her paýy 395,94 dollar boldy. Duşenbe güni, 15-nji sentýabrda paýnamalar iň ýokary derejesinde 8,06% gymmatlady.
Häzirki wagtda Mask Teslanyň gymmaty 140 milliard dollar bolan 413 million paýnamasyna eýelik edýär we bu kompaniýadaky takmynan 13% paýyna gabat gelýär.
4-nji awgustda kompaniýanyň direktorlar geňeşi ony baş direktor wezipesinde saklamak üçin paýnama görnüşinde 30 milliard dollar töweregi wagtlaýyn baýragy bermegi tassyklandygyny ýatladýarys. 6-njy noýabrda paýdarlar Maska 10 ýyl üçin 1 trillion dollara çenli öwezini doluş bukjasyny bermek meselesine garamagy göz öňünde tutýarlar. Bu bukja diňe bir bazar kapitalizasiýasy üçin däl-de (2035-nji ýyla çenli ol azyndan 8,5 trillion dollara çenli ösmeli), esasy maksatlara ýeteninden soň, kompaniýanyň paýnamalary görnüşinde tapgyrlaýyn tölegleri, şeýle hem düzedilen EBITDA boýunça 400 milliard dollarlyk tölegleri göz öňünde tutýar.
Häzirki wagtda kompaniýanyň kapitalizasiýasy 1,3 trillion dollardan geçýär. NVIDIA 4,3 trillion dollar bahasy bilen dünýäniň iň gymmat kompaniýasy bolmagynda galýar.
