Türkmenistanda umumybilim berýän mekdepleriniň 9-njy synplary üçin iki sany täze — «Koreý dili» we «Ýapon dili» okuw kitaplary neşir edildi. Bu işe daşary ýurt dilleriniň okadylyşyny döwrebaplaşdyrmak hem-de sanly tehnologiýalary okuw işine ornaşdyrmak boýunça maksatnamanyň çäginde badalga berildi diýip, Bilim ministrliginde habar berdiler.
Okuw kitaplary häzirki zaman talaplaryna laýyk taýýarlanylyp, birnäçe umumy aýratynlyklara eýedir. Olar üçin tekstleriň we sözlükleriň ses ýazgylary göz öňünde tutulyp, munuň özi okuwçylaryň diňlemek we dilden geplemek endiklerini ösdürmeklerine ýardam edýär.
«Koreý dili» boýunça taýýarlanan okuw kitabynda (awtorlary: D.Söýunnazarowa we M.Mämmedowa) okuw tapgyrlary, goşgular, nakyllar we tapmaçalar berlipdir. Kitap reňkli suratlar bilen bezelen.
«Ýapon dili» okuw kitaby bolsa H. Ito, N. Katsu we A. Taganowa tarapyndan taýýarlanylyp, maşgaladan başlap jemgyýet we medeniýet ýaly dürli mowzuklara bagyşlanan sekiz bapdan ybaratdyr. Kitabyň ahyrynda iki dilli sözlük ýerleşdirilipdir.
Bu neşirleriň ikisi hem okuwçylaryň daşary ýurt dillerini öwrenmäge gyzyklanmasyny ýokarlandyrmaga we ýokary hilli bilim üpjün etmäge gönükdirilendir.
