Hytaý Szýansu welaýatynyň Çançžou we Taýçžou şäherlerini birleşdirýän dünýäde iň uzyn wantly köpri bolan Çantaýy ulanylyşa girizdi. Desganyň uzynlygy 10,3 km barabar. Merkezi aralyk bolsa 1208 metr bolup, bu şeýle görnüşli köprüleriň arasynda dünýäde iň ulusy boldy. Bu barada Interesting Engineering habar berýär.
Köpri ýokary tizlikli awtomagistraly, adaty ýoly we 200 km/sag çenli tizlikli otlular üçin demirýoly birleşdirýär. Aşaky gatda ýollar simmetrik däl görnüşde ýerine ýetirildi: bir tarapdan demirýol ugurlary, beýleki tarapdan awtomobil ýoly geçýär. Täze infrastrukturanyň netijesinde iki şäherleriň arasyndaky ýol wagty 80 minutdan 20 minuta çenli azaldy.
Köpriniň gurluşygy alty ýyl töweregi dowam etdi. Inženerler täzeçe çözgütleri, şol sanda millimetre çenli gurnama takyklygy bilen paluba kranlaryny we ýük göterijiligi 10 000 tonna-metrden gowrak bolan intellektual diň kranlaryny ulandy. Kessonlar gurnalanda olary gyrmança ýa-da laý gatlaklaryna çümdürmekde rekord tizlik gazanyldy.
Köpriniň sütünleriniň beýikligi 350 metre ýetýär we bu 120 gatly diň bilen deňeçerdir. Olaryň romb görnüşli şekili we polat bilen betonyň garyndysy güýçli akymlara we temperatura üýtgemelerine durnuklylygy üpjün edýär. Ulag departamentinden taslamanyň ýolbaşçysy Li Çženiň aýtmagyna görä, köpriniň binýady goşmaça berklik üçin güýçlendirildi, bu desganyň köp ýyllaryň dowamynda howpsuz hereketi üpjün etmegine mümkinçilik berer.
Çantaý köprüsiniň ýolagçy we ýük gatnawlaryny çaltlaşdyrmagyna, şeýle-de Ýanszy derýasynyň deltasynyň ykdysady ösüşine itergi bermegine garaşylýar. Derýanyň uzynlygy 6300 kilometrden geçýär, ol öz gözbaşyny Tibet daglygyndan alyp gaýdyp, Gündogar-Hytaý deňzine çenli uzaýar.
Köpri diňe bir inženerlik üstünligi däl, eýsem sebitiň ulag ulgamynyň möhüm bölegi boldy.
