SpaceX ýakynda EchoStar amerikan aragatnaşyk operatoryndan 17 mlrd dollara 50 MGs diapazondaky ýygylyklary satyn aldy. Bu şertnama teswir bermek bilen, kompaniýanyň ýolbaşçysy Ilon Mask wagtyň geçmegi bilen Starlink-iň ähli adaty operatorlaryň ornuny eýeläp biljekdigini aýtdy.
Onuň aýtmagyna görä, Starlink öý internetini we ykjam aragatnaşygy birleşdirip, öýde we Wi-Fi zolaklaryndan daşary ählumumy birikmäni hödürläp bilýär. Mask ýakyn geljekde Starlink-iň AT&T, T-Mobile we Verizon ýaly kompaniýalary bazardan çykaryp bilmejekdigini, çünki olaryň ygtyýarynda jaňlar, habarlar we wideolar üçin has köp ýygylygyň bardygyny belledi. Verizon-y satyn almak mümkinçiligi baradaky soraga jogap bermek bilen, ol şeýle ähtimallygyň bolup biljekdigini aýtdy.
Milliarder satyn alnan ýygylyklaryň Starlink hemralary üçin ulanyljakdygyny belledi. Häzirki günde SpaceX-iň 8140 hemrasyndan 657-si ykjam gurluşlara gönüden-göni birikmegi goldaýar, galanlary adaty internet hyzmatlaryny üpjün edýär.
“Bu uzak möhletli taslama. Ol SpaceX-e hemralaryň gönüden-göni telefonlar bilen ýokary tizlikli birikmesini üpjün etmäge kömek eder. Ýöne telefonlaryň enjam bölegine käbir üýtgeşmeleri girizmeli” – diýip, Mask aýtdy.
Täze ýygylyklary ulanmak üçin ykjam gurluşlarda ýörite çipler gerek bolar, olary döretmek üçin bolsa iki ýyl töweregi wagt sarp ediler.
Ozal, iýulda SpaceX kompaniýasy T-Mobile bilen bilelikde T-Satellite hyzmatyny işe girizdi. Ol abonentlere ýerüsti ulgamyň ýok ýerinde Starlink hemralaryna birikmäge mümkinçilik berýär. Häzir ulanyjylar SMS iberip bilýär, ýöne oktýabrdan başlap AccuWeather we AllTrails hyzmatlarynyň, WhatsApp messenjeriniň we X sosial ulgamynyň goldawy elýeterli bolar.
