Artykmaç agramy bolan 5 ýaşdan 19 ýaşa çenli çagalaryň we ýetginjekleriň sany 2000-nji ýyldan bäri iki esse artyp, 391 milliona ýetdi. Bu barada BMG-niň Çagalar gaznasynyň (ÝUNISEF) çagalaryň iýmitleniş ýagdaýyna bagyşlanan täze hasabatynda aýdylýar.
“2000-nji ýyldan bäri artykmaç agramdan ejir çekýän 5 ýaşdan 19 ýaşa çenli çagalaryň we ýetginjekleriň sany 194 milliondan 391 milliona çenli iki esse artdy” – diýlip, resminamada aýdylýar.
Görkezijiniň ösüşi deň derejeli däldi. 2000-nji ýylda artykmaç agramyň iň pes derejesi hasaba alnan Günorta Aziýada 2022-nji ýyla çenli şeýle ýagdaýlaryň sany tas bäş esse ýokarlandy. Gündogar Aziýada we Ýuwaş umman sebitinde, Latyn Amerikasynda we Karib basseýninde, şeýle-de Ýakyn Gündogarda we Demirgazyk Afrikada bu görkeziji, takmynan, 10 göterim punkt ýokarlandy.
ÝUNISEF-iň hünärmenleri muny iýmitleniş endikleriniň üýtgemegi bilen baglanyşdyrýar. Olaryň maglumatlaryna görä, çagalaryň iýýän iýmitlerine, esasan, gaýtadan işlenen önümler we düzüminde şeker, duz, arassalanan krahmal, zyýanly ýaglar we goşundylar köp bolan fastfud girýär. Şol bir wagtyň özünde, şeýle tagamlary saýlamak köp ýagdaýlarda çagalaryň öz islegleri bilen däl-de, “sagdyn däl iýmit gurşawy” bilen baglanyşyklydyr.
Hasabatda şeýle önümleriň dükanlarda we mekdeplerde giňden hödürlenýändigi, internetde we sosial ulgamlarda olaryň mahabatlarynyň bolsa öndürijilere ýetginjekleri çekmek üçin goşmaça mümkinçilik berýändigi bellenilýär.
