Oracle amerikan korporasiýasy OpenAI kompaniýasy bilen 300 mlrd dollarlyk şertnama baglaşdy diýip, The Wall Street Journal ýazýar. Şertnama bäş ýyla niýetlenýär we ABŞ-nyň çäklerinde 4,5 GWt kuwwatly maglumat merkezleriniň kärendesini göz öňünde tutýar.
Neşiriň maglumatlaryna görä, energiýanyň şeýle möçberi 4 mln töweregi öýüň sarp edişi bilen deňeşdirilýär. Şertnama 2027-nji ýylda güýje girer. Neşir ony “töwekgelçilikli iş” diýip atlandyrýar.
Materialda OpenAI-iň her ýyl 60 mlrd dollar tölemeli boljakdygy aýdylýar. Ýöne kompaniýanyň häzirki girdejisi ýylda 10 mlrd dollara barabar. Oracle hem, öz gezeginde, geljekki girdejisiniň esli bölegini bir müşderi bilen baglanyşdyrýar. Şertnamanyň şertlerini berjaý etmek üçin kompaniýa karz alyp, täze maglumat merkezlerini işe girizmeli bolar.
Şertnamanyň öňüsyrasy Oracle çärýek görkezijileriniň ýokarlanandygy barada hasabat berdi. Kompaniýanyň paýnamalary bir günde 39,7% ýokarlandy. Korporasiýany esaslandyryjy Larri Ellisonyň baýlygy bir günde 101 mlrd dollar artyp, 393 mlrd dollara ýetdi. Kapital derejesi boýunça ol telekeçi Ilon Maskdan öňe geçdi.
