2025-nji ýylyň 30–31-nji oktýabrynda Germaniýanyň Frankfurt şäherinde Türkmenistanyň Ykdysadyýet günleri geçiriler. Çäre Türkmenistanyň we Germaniýanyň arasyndaky özara bähbitli hyzmatdaşlygy ösdürmegi maksat edinýär.
Forumyň guramaçylary hökmünde Türkmenistanyň Söwda-senagat edarasy we TMT Consulting Group çykyş edýär. Çäre Germaniýanyň Gündogar ykdysady komitetiniň we Mittelstand birleşiginiň goldawy bilen guralýar. Foruma bu guramalara agza öňdebaryjy kompaniýalar gatnaşar. Olar üstünlikli hyzmatdaşlyk üçin zerur tejribä we mümkinçiliklere eýe.
Ösen tehnologiýalara eýe bolan Germaniýa bilen giň önümçilik kuwwatyna eýe bolan Türkmenistan birnäçe möhüm ugurlar boýunça tagallalaryny birleşdirmegi meýilleşdirýär. Olaryň hatarynda: maliýe, saglygy goraýyş, söwda, ulag, nebitgaz we nebithimiýa pudagy, oba hojalygy we dokma senagaty bar.
Forum tejribe alyşmak, uzak möhletli işewür gatnaşyklary ýola goýmak hem-de innowasiýalary ornaşdyrmak üçin möhüm meýdança bolar.
Guramaçylar işewürleriň we bilermenleriň Türkmenistanyň Ykdysadyýet günlerine gatnaşyp, hyzmatdaşlygyň täze mümkinçiliklerini açmaga we ykdysady gatnaşyklary berkitmäge çagyrýarlar.
Goşmaça maglumat üçin salgy: https://tmt.tm/ru/event/turkmenistan-economy-days
Telefon: +99361776088
E-poçta: kemal.ferd@cci.gov.tm
