2026-njy ýylyň dünýä çempionaty üçin Ýewropada saýlama ýaryşynyň 6-njy tapgyr oýunlarynyň birinde Norwegiýanyň milli ýygyndysy Moldowadan uly hasap bilen üstün çykdy. Oslodaky oýun 11:1 hasabynda tamamlandy.
“Mançester Sitiniň” hüjümçisi Erling Holand bäş gol geçirip, iki assist etdi. “Reýnjersiň” ýarymgoragçysy Telo Osgor dört gol girizdi. “Arsenalyň” kapitany Martin Edegor bir gol geçirdi we iki assist etdi. Ýene bir goly öz hasabyna Horn Maýer ýazdy.
Şeýle-de bolsa, bu hasap Norwegiýa üçin rekord bolmady: 1946-njy ýylda topar Finlýandiýany 12:0 hasabynda utdy. Ýöne Moldowanyň milli ýygyndysy üçin bu taryhda iň uly ýeňliş boldy.
Holand aýratyn üstünlik gazandy. Onuň bäş goly soňky 48 ýylda dünýä çempionatynyň saýlama oýunlarynda ilkinji penta-trik boldy. Soňky gezek şeýle waka 1977-nji ýylda, awstriýaly Hans Krankl Awstriýa – Malta oýnunda bäş gol geçirende bolupdy. FIFA-nyň maglumatlaryna görä, Holand XXI asyrda dünýä birinjiligi üçin saýlama ýaryşynda şeýle netijä ýeten ilkinji futbolçy boldy.
Bu ýeňişden soň Norwegiýa 15 utuk ýygnap, I toparçada birinji orna çykdy. Indiki oýny topar 11-nji oktýabrda öýünde Ysraýyla garşy geçirer.
