Oracle korporasiýasynyň ýolbaşçysy Larri Ellison Bloomberg-de baýlaryň sanawynda ilkinji gezek birinji ýeri eýeledi. Ol Tesla we SpaceX kompaniýalarynyň esaslandyryjysy Ilon Maskdan öňe geçdi. Agentligiň maglumatyna görä, Ellisonyň baýlygy 393 mlrd dollara ýetdi, Maskyň baýlygy bolsa 385 mlrd dollar boldy.
Ellisonyň baýlygynyň tiz ösmegi onuň kapitalynyň bir günüň içinde 101 mlrd dollar ýokarlanmagy bilen baglanyşykly — bu bolsa Bloomberg reýtinginiň taryhynda iň uly ösüş boldy. Şeýle ýagdaý Oracle korporasiýasynyň aksiýalarynyň çarşenbe günki söwdada 41,8% ýokarlanmagy bilen baglanyşyklydyr. Bu bolsa kompaniýanyň çärýeklik hasabatynda emeli aň tehnologiýalaryndan gelýän girdejileriň artmagy we oňyn çaklamalar bilen düşündirilýär.
Mask tas bir ýyl bäri sanawda birinji ýeri saklapdy. Ilkinji gezek ol 2021-nji ýylda sanawda öňdeligi eýeläpdi, ýöne soňra wagtlaýynça Amazon-yň esaslandyryjysy Jeff Bezosa hem-de LVMH-niň ýolbaşçysy Bernard Arno ýoly beripdi. Häzirki wagtda olaryň orny sanawda degişlilikde dördünji we sekizinji ýerde durýar.
Forbes hem Ellisonyň baýlygynyň artandygyny belläp geçýär (102 mlrd dollar ýa-da umumy baýlygynyň 35%-e golaýy), onuň baýlygyny 395 mlrd dollar diýip bahalandyrypdy. Ýöne Forbes-iň reýtinginde Mask entek öňdeligi saklaýar, onuň baýlygy 437 mlrd dollar diýip hasaplanylýar.
Ellison häzir 81 ýaşynda. Ol Oracle korporasiýasyny 1977-nji ýylda Bob Maýner we Ed Outs bilen bilelikde esaslandyrdy. 37 ýyl kompaniýa ýolbaşçylyk edeninden soň, 2014-nji ýylyň sentýabrynda baş direktor wezipesinden çekildi we dolandyryjylar geňeşiniň başlygy hem-de tehnologiýalar boýunça direktory boldy.
