BMG-niň “Ýurtlaryň ilat sanynyň geljegi” baradaky hasabatyna görä, 2023-nji ýylda dünýäde 132 milliondan gowrak çaga dünýä indi, bu bolsa her sagatda 15 000 töweregi bäbegiň dünýä inendigini aňladýar.
Hindistan täze doglan bäbekleriň sany boýunça dünýäde öňde barýar, bu ýurtda sagatda 2600-den gowrak çaga dogulýar. Bu görkeziji, takmynan, 1000 bäbegiň dogluşy bilen ikinji ýerde durýan Hytaýyňkydan iki esse köpdür. Şeýlelik bilen, dünýäde dogulýan her dördünji bäbegiň diýen ýaly göbegi Hindistanda ýa-da Hytaýda kesilýär.
Soňra sanawda Nigeriýa (857), Pakistan (786), Indoneziýa (512), Kongo Demokratik Respublikasy (499) we Efiopiýa (469) durýar. Ilkinji dokuzlygy ABŞ (418) bilen Bangladeş (398) jemleýär.
Bu sanaw iň köp ilatly ýurtlaryň sanawy bilen gabat gelýär diýen ýaly. Öňdebaryjylaryň arasynda diňe Braziliýa bilen Russiýa ýok. BMG-niň maglumatlaryna görä, Braziliýada sagatda 297 çaga, Russiýada 148 çaga dünýä inýär.
Munuň sebäbi, birnäçe ýurtlarda çaga dogluşynyň derejesi peselmek bilen. Bilermenleriň berýän bahasyna görä, munuň oňyn täsiri hem bolup biler: ilatyň köpelişiniň haýallamagy bilimiň derejesini ýokarlandyrmaga we zähmet pudagynda mümkinçilikleri giňeltmäge şert döredýär. Ölümiň derejesiniň peselmegi bilen utgaşyklykda, bu işe ukyply ýaşdaky adamlaryň sanynyň köpelmegine we eklençdäkileriň sanynyň azalmagyna getirýär. Bu täsire demografiki diwidend diýilýär we adam başyna düşýän girdejiniň we sarp edilişiň ýokarlanmagyna goşant goşup biler.
