2025-nji ýylyň birinji ýarymynda dünýäde umumy kuwwaty 380 gigawat bolan Gün elektrik stansiýalary işe girizildi. Bu görkeziji 232 gigawat bolan 2024-nji ýylyň degişli döwri bilen deňeşdirilende 64% köp diýip, Electrec ýazýar.
Bu ösüşi, esasan, umumy kuwwaty 256 gigawat bolan stansiýalary guran Hytaý üpjün etdi. Ýagny, ýurt beýleki ähli ýurtlaryň bilelikdäki netijelerindenem ýokary görkeziji gazanyp, ähli täze kuwwatlyklaryň üçden iki böleginden gowragyny işe girizdi. Deňeşdirmek üçin: dünýä geçen ýylyň sentýabr aýynda 350 gigawatlyk bellikden geçdi, şu ýyl bolsa eýýäm iýun aýynda şeýle netijä eýe boldy.
2024-nji ýyldaky maglumatlara görä, dünýäde Gün energiýasynyň öndürilişi, 2023-nji ýyl bilen deňeşdirilende, 28% ýokarlandy we elektrik energiýanyň iň çalt ösýän çeşmesine öwrüldi.
Beýleki ýurtlar hem ösüşi görkezýärler. 2025-nji ýylyň ilkinji alty aýynda olar, takmynan, 124 gigawat kuwwatlygy işe girizdiler, bu bolsa bir ýyl ozalkydan 15% köpelendigini aňladýar. Hindistan 24 gigawat bilen ikinji ýeri eýeledi, bu bolsa bir ýyl ozalkydan 49% köpelendigini aňladýar. ABŞ 21 gigawat bilen 4% ýokarlanyp, üçünji ýeri eýeledi.
Afrika bazarynda Hytaýyň Gün panelleriniň importy ep-esli artdy, bu bolsa geçen ýyl bilen deňeşdirilende 60% ýokarydyr. Şeýle-de bolsa, takyk gurnama maglumatlarynyň ýoklugy yklymda tehnologiýany durmuşa ornaşdyrmagyň hakyky gerimine baha bermegi kynlaşdyrýar.
