4-nji sentýabrda Wena şäherinde Awstriýanyň Ýewropa we Halkara işler boýunça federal ministri hanym Beate Meinl-Reisinger bilen Merkezi Aziýa ýurtlarynyň ilçileriniň duşuşygy geçirildi. Oňa Türkmenistanyň Awstriýadaky ilçisi H.Amannazarow gatnaşdy diýip, Türkmenistanyň DIM-niň metbugat gullugy habar berýär.
Merkezi Aziýa ýurtlarynyň ilçileriniň duşuşygy Awstriýa bilen Merkezi Aziýa ýurtlarynyň arasynda açyk we konstruktiv dialog üçin gymmatly meýdança öwrüldi. Ara alnyp maslahatlaşylan meseleler sebitleýin hyzmatdaşlygy ösdürmäge, ikitaraplaýyn gatnaşyklary berkitmäge hem-de energetika, ekologiýa durnuklylygy we ykdysady ösüş ugurlarynda umumy meseleleri çözmäge gönükdirildi.
Ilçi H.Amannazarow Türkmenistanyň, oňyn bitaraplyk syýasatyna we halkara hyzmatdaşlyga laýyklykda, Awstriýa we tutuş Ýewropa jemgyýetçiligi bilen hyzmatdaşlyk gatnaşyklaryny pugtalandyrmaga ygrarlydygyny belledi.
Duşuşygyň dowamynda Merkezi Aziýa bilen Ýewropa Bileleşiginiň arasynda durnuklylygy, durnukly ösüşi we integrasiýanyň çuňlaşdyrylmagyny ilerletmek ugrunda umumy gyzyklanmalaryň bardygy tassyklanyldy.
