30-njy awgustdan 3-nji sentýabr aralygynda Türkmenistanyň söwda we daşary ykdysady aragatnaşyklar ministri N.Agahanowyň ýolbaşçylygyndaky türkmen wekiliýeti Ýaponiýanyň Osaka we Tokio şäherlerine iş saparyny amala aşyrdy. Bu barada Türkmenistanyň DIM-niň metbugat gullugy habar berýär.
Saparyň dowamynda türkmen wekiliýetiniň Ýaponiýanyň söwda we dokma senagaty pudagynda işleýän guramalary we kompaniýalary bilen birnäçe ikitaraplaýyn duşuşyklary geçirildi.
Tokio şäherinde Ykdysady hyzmatdaşlyk boýunça ýapon-türkmen komitetiniň başlygy, «ITOCHU» korporasiýasynyň Direktorlar geňeşiniň agzasy, Ýerine ýetiriji wise-prezidenti, Maşynlary we enjamlary öndürmek boýunça kompaniýasynyň prezidenti H.Tsubaý bilen duşuşyk geçirildi. Şeýle-de N.Agahanow Ýaponiýanyň Daşary söwda guramasynyň (JETRO) prezidenti N.Işiguro bilen hem duşuşdy.
Osaka şäherinde «EKSPO-2025» Bütindünýä sergisindäki Türkmenistanyň pawilýonynda türkmen wekiliýeti bilen Ýaponiýanyň «EKSPO-2025» assosiasiýasynyň Baş sekretarynyň orunbasary M.Içinokiniň duşuşygy geçirildi. Şeýle-de türkmen wekiliýeti «EKSPO-2025» Bütindünýä sergisindäki Saud Arabystany Patyşalygynyň milli pawilýonynyň komissary, Katar döwletiniň milli pawilýonynyň direktory hem-de «Masui Co. Ltd» kompaniýasynyň wekilleri bilen duşuşdy.
Agzalan duşuşyklaryň çäklerinde taraplar ýapon kompaniýalarynyň Türkmenistandaky mümkinçiliklerini, eksport-import gatnaşyklaryny ösdürmek meselelerini hem-de türkmen dokma önümlerini ýapon bazaryna çykarmak boýunça başlangyçlary öňe sürmegi ara alyp maslahatlaşdylar.
