OpenAI Hindistanda uly maglumat merkezini gurmagy meýilleşdirýär. Ol ýurtda iň ulularyň biri we Aziýada emeli aň infrastrukturasyny ösdürmekde möhüm ädim bolup biler diýip, Bloomberg agentligi habar berýär.
Çeşmeleriň maglumatlaryna görä, kompaniýa azyndan 1 gigawatt kuwwatly desganyň gurluşygy üçin ýerli hyzmatdaşlary gözleýär. Hindistan eýýäm dünýä derejesindäki tehnologiýa kompaniýalarynyň ünsüni özüne çekdi: bu ýerde Microsoft, Google we Aziýanyň iň baý adamy şeýle taslamalary ösdürmek bilen meşgullanýar.
Taslamanyň ýerleşjek ýeri we durmuşa geçiriljek möhleti barada entek maglumat ýok. Habar çeşmeleri OpenAI-iň baş direktory Sem Altmanyň şu aýda Hindistana sapary wagtynda bu taslamany yglan edip biljekdigini, ýöne gutarnykly çözgüdiň heniz kabul edilmändigini belleýär.
Täze merkez 500 mlrd dollarlyk Stargate taslamasynyň bir bölegi bolar. Onuň çäklerinde OpenAI eýýäm SoftBank Group we Oracle bilen bilelikde 4,5 gigawatt kuwwatly desgalary gurdy.
Hindistandaky kärhana kompaniýa şahsylaşdyrylan çat-botlary ösdürmäge we maglumatlaryň ýurtdan daşary çykmagy bilen bagly aladalary azaltmaga kömek etmeli. Şeýle-de, OpenAI Hindistan üçin dil modellerini döretmäge gönükdirilen 1,2 mlrd dollarlyk IndiaAI Mission başlangyjynyň çäklerinde federal hökümet bilen hyzmatdaşlyk etmäge taýýardygyny aýtdy.
