2025-nji ýylyň birinji ýarymynda dünýäde elektromobilleriň satuwy geçen ýylyň degişli döwri bilen deňeşdirilende 29,4% ýokarlanyp, 9,29 mln birlige ýetdi.
Esasy ösüşi Hytaý, Ýewropa we ABŞ üpjün etdi. 8,4 mln elektromobil ýa-da umumy möçberiň 90,4%-i bu bazarlaryň paýyna düşdi. Hytaý dünýäde iň uly elektromobil bazary adyny saklady.
Taýwanyň Digitimes gazetiniň çaklamasy boýunça, 2025-nji ýylyň ahyryna çenli global elektromobil stauwy 20 million birlikden geçer, bu hem olaryň bazardaky paýyny 23%-e çenli artdyrar. Hytaýda 14 milliondan gowrak, Ýewropada 3,8 million töweregi elektromobil satylar. ABŞ-da ösüş, syýasy ýagdaýlary göz öňünde tutsaň, gowşap biler.
Ýylyň birinji ýarymynda Hytaýda satuw 35,5% — 5,88 mln elektromobile çenli ýokarlandy, bu hem dünýä bazarynyň 63%-den gowragyny emele getirdi. Islege döwlet tarapyndan berilýän maliýe kömegi we käbir modellerde L2/L2+ derejeli sürüjä kömek ulgamlarynyň ornaşdyrylmagy ýardam etdi.
Ýewropada ilkinji alty aýda 1,78 million elektromobil satyldy – bu bir ýyl ozalkydan 23,6% köpdür, bazardaky paý bolsa 21%-den 26,1%-e çenli artdy. Ösüş boýunça öňdebaryjylar Ispaniýa (+83%), Germaniýa (+42%), Italiýa (+41%) we Beýik Britaniýa (+36%) boldy. Munuň sebäpleriniň biri ÝB-de uglerod zyňyndylary boýunça düzgünleriň güýçlendirilmegi boldy.
ABŞ-da birinji ýarymýyllykda satuw ösüşi bary-ýogy 2,1% bolup, 740 müň elektromobile ýetdi. Birinji çärýekde satuw 10% ýokarlandy, ýöne II çärýekde elektromobiller we zarýad stansiýalary üçin maliýe kömeginiň azalmagy, şeýle-de inflýasiýanyň sarp ediş islegine täsir etmegi sebäpli 5% azaldy.
Ösüp barýan ýurtlarda ýarym ýylda 900 müň töweregi elektromobil satyldy, bu 32% ösüş bolup, ABŞ-nyň görkezijilerinden ýokarydyr. Ösüş boýunça öňdebaryjylar Günorta-Gündogar Aziýa, Latyn Amerikasy we Hindistan boldy.
ABŞ-da satuw ösüşiniň haýallandygy sebäpli, 2025-nji ýylda global elektromobil üpjünçiligine Hytaýdaky durnukly isleg we ÝB-niň ekologiýa syýasatynyň berkemegi uly goşant goşar.
