Türkmenistan doganlyk owgan halkyna, ilkinji nobatda, Owganystanyň ýertitremeden ejir çeken çagalaryna we ýaşaýjylaryna däri-dermanlary, azyk we iýmit, egin-eşik önümlerini, durmuşda zerur bolan beýleki önümleri ynsanperwerlik kömegi hökmünde iberer. Degişli Buýruga Prezident Serdar Berdimuhamedow gol çekdi.
Resminama laýyklykda, ynsanperwerlik kömegini Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň adyndan ibermeklik bellenildi.
Bu günki gün Türkmenistanda kyn günde doganlyk goluny uzatmak we goldaw bermek däpleri döwletleriň arasynda dostlukly gatnaşyklary, hoşniýetli goňşuçylygy berkitmegiň binýady hökmünde mynasyp dowam etdirilýär. Döwlet Baştutanymyzyň goňşy ýurduň halkyna ynsanperwerlik kömegini ibermek baradaky çözgüdi hem köp sanly adam pidalaryna, şikes ýetmelere, uly weýrançylyklara getiren tebigy betbagtçylyga duçar bolan adamlara ruhy goldawdyr, owgan halkyna bildirilýän çuňňur hormatyň nobatdaky beýanydyr.
31-nji awgustda Hindiguş daglarynda 6,2 magnitudaly ýertitreme bolup geçdi. Onuň merkezi Owganystanyň gündogarynda Asadabat şäherinden 27 km günorta-günbatarda ýerleşdi. Ýerasty sarsgynlar obalary ýumurdy, opurylmalara getirdi we kommunikasiýa ulgamlaryna zeper ýetirdi. Birnäçe ilatly nokatlary barmak kynlaşdy. Soňky maglumatlara görä, pida bolanlaryň sany 2,2 müň adamdan geçdi, 3,6 müň adam şikes aldy.
Halas ediş işleri çylşyrymly dag şertlerinde geçirilýär. 2-nji sentýabrda şol sebitde 5,5 magnitudaly ýene-de bir ýertitremesi hasaba alyndy.
